EDITORIAL
La
nuestra Tierra se mueri
Esta frasi bien vali pa chalral
alreol de la nuestra tierra, El Rebollal,
y de cómu anguna de la genti que vivi en ella está dejandu moril la nuestra cultura,
la nuestra naturaleza, la nuestra lengua, los nuestrus
pueblus,... Tó lo que jadi especial a la nuestra tierra está en peligru de desaparecel dis quí pocu tiempu si no se le poni remediu. Peru esta mesma frasi tieni
un sinificáu más grandi, y
que se puedi ussal pa chalral alreol
de la nuestra Tierra, el nuestru planeta Tierra.
Nesti mes
de jebreru la
ONU (Organización de las Nacionis Uñías) ha sacáu un escritu idiendu qu’el nuestru planeta está en peligru. Y es que, pol mé del hombri, el tiempu va a cambial. ¿Cómu? Lo qu’idin los sabius no es pa estal contentus. Va a llovel menus. Vamus
a tenel más mesis de sequeá, y muchus añus de sequeá. Y cuandu llueva, va a llovel tó de golpi, con muchu jostigu. Los yelus de los Polus se van a derretil, y los maris van a subil tapandu islas, prayas, ciudadis enteras,... La genti que viva al láu del mal va
a tenel que dejal la su cassa. Muchus animalis
van a desaparecel pa siempri, lo mesmu que muchas prantas. Y espérati a vel qué pasa con nusotrus...
Y es qu’el tiempu está cambiandu. Tó lo que jademus los hombris tieni de vel con el cambiu qu’estamus viendu. Tó lo que los hombris l’estamus jadiendu a la Madri Tierra
y a la Madri
Naturaleza mos va a pasal cuentas dis quí a pocu tiempu,
si no estamus apencipiandu
a pagalu ya. Vel cómu ardin pinalis,
robrealis,... no es de baldi.
Emporcal las aguas tampocu.
Gastal más energía de la que se necesita tampocu. Enllenal tó de basura, tampocu. No es, comu piensa anguna genti, que sean más emportantis
los animalis que las presonas.
Es que, en verdá, lo qu’está
encima la mesa es el futuru de la nuestra tierra. Y
si no jademus algu, dis quí a pocu
tiempu vamus a vel cómu las cosas cambian... a peol. Dis quí
a unus añus lo vamus a barruntal, esu seguru. Llevamus
2 añus de sequeá, dos añus d’avisu, asina
que naidi diga dispués lo
de “nusotrus nu sabiamus ná”.
Tenemus
de mirar qué podemus jadel nusotrus pa tratal
mejol a la Madri Naturaleza.
Quiciás cosas tan cencillas
comu no tenel la teli puesta cuandu no la estamus viendu, o regal los tiestus con agua del charail, o enllenal la lavaora en vés de ponela a la metá, o no tiral papelis al suelu (o a las cunetas, o en metá
el campu), o no arcendel
las lucis cuandu se ve de
sobra, o no cogel el cochi pa il a un lugal
andi andandu tardamus 5 minutus,... Son cosinas chicas que sí están en la nuestra manu y que, quiciás, salvin un poquinu la nuestra
tierra y el nuestru futuru.
Muchas vecis cuesta lo mesmu jadel las cosas bien que jadelas mal. En estu de cudial la
Naturaleza, jadel las cosas mal va
a sel, a la larga, muchu
más caru que jadel las cosas
bien. Comu ya diji más p’arriba, quiciás dis quí a pocu
vamus a apenciial a pagal caru tó
el mal que le estamus jadiendu
a la Madri
Tierra. Quiciás estus
dos añus de sequeá son el pricipiu del pagu. De seguru, el preciu va a sel altu, muchu
más altu.
Y es qu’el futuru de la nuestra Tierra (y de la nuestra tierra) está
en las nuestras manus. Tó
lo que jagamus puedi sel pa bien o pa
mal de la nuestra tierra, de la nuestra genti, de los
nuestrus hijus y nietus. En las nuestras manus está
el dejalis algu... o no dejalis ná. Esu
vali pa la nuestra tierra: podemus dejali d’herencia a los nuestrus dagalis una comarca especial, El Rebollal,
con la su cultura, la su naturaleza, la su lengua, las sus costumbris,...
Con tó lo que jadi d’El Rebollal algu
especial. O podemus no dejalis
ná (qu’es el pasu que llevamus). Con la
nuestra Tierra pasa lo mesmu. El problema es que, si acabamus de derrotal la Tierra, los nuestrus dagalis no tienin otra Tierra ninguna a la que emigral.
Esta Tierra es la única que tenemus: no la dejemus moril.
JOSÉ BENITO MATEOS PASCUAL
tamborileru de Peñaparda y Villasrubias
direutol de LA GURULLA y de VAUCARRUS
GOLVEL