LUGARIS D’EL REBOLLAL

Riufríu (Villarrubias)

La cabra de Riufríu, jecha nel añu 1981

(...) en esta jessa (El Jaqui) tieni la su nacencia el Riufríu, que anque no mú grandi, las sus aguas son mú güenas y crían güenas truchas: hai muchus lobus, jabalinis y corzus; y tamién caza chica.

(SALAMANCA, Diccionario Grográfico-Estadístico-Histórico. 1854-1850. Pascual Madoz)

Riufríu es unu d’esus lugaris d’El Rebollal llenus d’hestoria, naturaleza y recuerdus. Un lugal d’encuentru nel corazón d’El Rebollal, entri Villarrubias y Peñaparda.

RIUFRÍU, LUGAL D’ENCUENTRU

Dendi que yo recuerdu, Riufríu ha síu siempri un lugal d’encuentru. Allí, antis de jadelsi las piscinas de Peñaparda, las gentis de Peñaparda y Villarrubias iban a bañalsi, lo mesmu ena Pesquera, que ena Bañera, nel Valli,... Allí s’ajuntaban tólus veranus a nadal, chalral, merendal, paseal, tomal algu ena taberna,... Pa toas esas cosas, del láu mangurrinu, un pocu pol baju la puenti, se pusun unas mesas y unus bancus pa sentalsi y comel, unus bañus, unus lugaris pa remualsi, unus escolumbius, un pal de juentis y unas parrillas pa asal carni. Tó ellu entri robris, con lo qu’en veranu no se pasa tantu calol. Un lugal pa il con lus amigus o la familia a pasal un güen día de campu.

Pesquera de Riufríu	Parrillas y mesas del merenderu
Escolumbius y una de las juentis	La otra juenti del Riufríu

RIUFRÍU, UN LUGAL RICU EN NATURALEZA

Nel Riufríu la naturaleza puedi velsi bien abondu. El ríu tieni abondu de pecis, y tieni cotu de pesca. Los pecis más preseguíus son las truchas (ya lo idía Pascual Madoz nel añu 1850), anque tamién puedin encontralsi barbus y otras crasis de pecis. Enus alreoris del ríu se puedin vel tamién a los picapecis, que vivin de comel esu, pecis. Y, anque ya no hai lobus, sí que se ven jabalinis, liebris, conejus, dorras,... y quiciás tamién corzus, comu idía Pascual Madoz.

Ena orilla el ríu crecin los alisus y, a dos pasinus de ná, los robris, del robri rebollu, el que da el su nombri a la comarca. En estus árbolis podemus vel, además de los picapecis, otrus pájarus comu bubillas, rabilargus,...

Riufríu con los sus robris en dambas dos orillas

RIUFRÍU, UN LUGAL RICU EN HESTORIA

Anque a angunu le puea sonal raru, tamién el Riufríu tieni la su hestoria. Y es que la Pesquera de Riufríu la jidun pa una fábrica de lús que, ena metá del sigru XX, jué una de las que dió lús a los nuestrus pueblus. Entovía se puedin vel los canalis por andi iba el agua, el vasu andi queaba arrecogía,...

Canal pol ondi iba el agua	El vasu andi iba a paral el agua

GOLVEL