NATURALEZA

L’aguzanievis. Las gamonas.

L’AGUZANIEVIS (Motacilla Alba)

L’aguzanievis es unu de los pájarus con más saleru que corrin y vuelan polus nuestrus campus. Es un pajarinu d’alreol de 18 cm de largu, dendi el picu jasta la cola. Es mú cendillu conocelu pol mé de las sus coloris (brancu y gris – tirandu a negru), el su mó y manera de correl y el mó y manera de movel a cá istanti la su cola arriba y abaju. Ena nuestra tierra se puedi vel a esti pájaru cuandu llega el fríu. El restu del añu vivi pal norti d’Uropa, pos es un pájaru que vivi nel fríu. Poni dos vecis al añu, y 5 ó 6 güevus de cá vés. Jadi los nialis en cualisquiel buracu qu’encuentra, lo mesmu natural que jechu por el hombri. Comu curiosidá, l’aguzanievis es el pájaru nacional de Letonia dendi’l añu 1960. Afotu arrecogía de la web de Treknature

LAS GAMONAS (Plantago Lanceolata)

Hogañu la himus olviáu, peru antañu las gamonas juerun mú emportantis pa la nuestra genti, y ayuarun a que los nuestrus padris y agüelus tuviesin pa comel en tiempus enque ná tenían de llevalsi a la boca. La gamona es una pranta que puedi llegal a tenel medio metru d’altu y que echa froris (gamonitus) dendi metá de la primavera jasta’l final del veranu. Creci en jessas, práus y alreoris de los caminus. Las gamonas son unas prantas mú ussá pa jadel remedius naturalis, en medecina natural (comu conseju, no se puedi jadel ná sin leel librus especialis alreol del tema). Anque las hojas, antis de salil los gamonitus, se puedin ussal pa ensalás y sopas, la nuestra genti las ussaba, más que ná, pa dal de comel a los gorrinus, cuandu no había otra cosa. Y esu, en tiempus de necesidá, valía muchu. Pa resumil, las gamonas son unas prantas tan pocu conocías como güenas. Afotu jecha pol José Benito Mateos Pascual

GOLVEL