QUÉ JUÉ DE...
En esta nueva seición
vamus a palral d’esas cosinas de los nuestrus pueblus que, pol una cosa o pol otra, han dejáu de sel comu
eran o se han perdíu del tó.Cá
unu sabi lo que falta nel su pueblu, lo que se ha jechu bien o mal, asina qu’esperamus que mos mandéis las
vuestras “denuncias”. Podéis mandal el vuestru parecel, los vuestrus escritus, las vuestras afotus,...
a la nuestra direición de corréu:
lagurulla@yahoo.es
El potru de Peñaparda
|
|
Unu de
los malis de la nuestra tierra es pensal
que tó lo que vieni d’atrás es malu o no vali ná. Asina
está pasandu cona nuestra
lengua y asina ha pasáu con
muchas de la cosas de los nuestrus pueblus: cassas, cuartus viejus,... Acabandu asina, poquinu poquinu, con aquellu que de verdá jadi de los nuestrus pueblus algu especial.
Una de esas cosas que jadían
los nuestrus lugaris más políus eran los potrus. Los potrus eran un “esqueletu” de maera nel que s’uñían
los animalis pa jerralus. Hogañu, anque entovía hai
animalis pa jerral (por suerti, mos quean burrus
y caballus pa vel polas nuestras callis), ya no se puedin vel potrus de jerral.
Y es qu’angunu que se las ha dáu
de sabiu a dáu en pensal esu de que “¡Esu ya no vali pa ná!” Y asina
ha acabáu con una de las mejoris
muestras de patrimoñu etnográficu
que se podían vel en los nuestrus
pueblus. Porque en otrus lugaris esas cosas las guardan comu
un tesoru y aquí... ¡si es que paici
que mos avergonzamus de tó, carallu!
Voi a chalral alreol del potru de Peñaparda, anque el mesmu caminu han lleváu los otrus potrus de jerral de los otrus pueblus d’El
Rebollal. Nel veranu del añu 2003, recién apencipiáu el mantatu de los justicialis del ayuntamientu, anguién mandó aserral el potru de jerral de Peñaparda con
la escusa de “qu’estaba pochu”. Anque los que himus pasáu por allí tantas y
tantas vecis sabemus que no
le pasaba ná. Peru el potru lo cuertarun, y sin potru mos queamus.
La cosa de por sí es mala: quealmus
asina sin una parti del nuestru patrimoñu cultural. Craru, lo cuertarun con la
“promesa” de jadel otru nuevu. Promesa que vieni dendi’l veranu del añu 2003. Al mes de jebreru de
2007, entovía no se sabi ná del potru. ¿Por qué no se ha jechu en 4 añus? Pos no sabemus, anque himus preguntáu. Primeru, porque había que buscal
a anguién pa jadelu. Dispués porque había que cuertal la maera con el cuartu menguanti d’eneru. Dispués porque ¡estaban buscandu un robri! (será que n’El Rebollal no hai robris). Dispués
porque los obrerus del ayuntamientu
estaban ocupáus. Y hogañu
que “pa la sotra
legislatura”. Y asina estamus.
Cuatru añus van que se cuertó el potru y entovía estamus sin él. ¿Qué vos pareci? Mandá los vuestrus pareceris (a favol o en contra) a lagurulla@yahoo.es
(esu sí, respetandu a los
demás).