VOCABULARIU

El tiempu

En estus tiempus modernus, la genti está pendienti del tiempu pa las fiestas, vacancias, ilsi a la praya, a esquial, al ríu o a las piscinas. Y han deprendíu de la tilivisión un montonáu de palabras alreol del tema. Peru antañu la nuestra genti tamién estaba pendienti del tiempu pol mé del campu, y estas son angunas de las palabras que se han ussáu en la nuestra tierra pa mental las cosas del tiempu.

· AGUARRÁ. Se idi asina cuandu lluevi muchu: “¡Menúa aguarrá ha caíu!”.

· AIRI / AIRÓN. El airi, cuandu sopra juerti, se idi que es un airón: “¡Vaya un airón que ha jechu esta mañana!

· CENCELLÁ / CENTELLÁ. Cuandu cai una helá mú juerti y está tó brancu comu si hubiesi neváu, se idi que “ha caíu una cencellá” (tamién se idi “centellá”).

· DONDEÁ. El airi no sopra siempri de continu, y cada golpi que sopra algu juerti es una dondeá.

· JALAMERU. Es el airi que vieni dendi Jálama.

· MUELLI-MUELLI. Cuandu lluevi mú poquini, casi sin mojal, esu es el “muelli-muelli” (algu asina comu el “xirimiri” de los vascus).

· NIEBRA. Es lo que se da cuandu las nubis están al ras del suelu y no se ve a dos en un burru.

· NIEVI. La nievi es esu brancu que cai del cielu y a tós mos gusta vel. ¿Quién no se ha sentíu comu’n dagal cuandu se ha levantáu de la cama y ha vistu tó neváu?

· NUBIS / NUBRÁU. Cuandu tó esta llenu de nubis, está nubráu. Dispués d’esu, puedi venil cualquiel cosa: agua, nievi,...

· YELU. Cuandu el calol está pol baju el ceru, el agua se güelvi dura: esu es el yelu.

GOLVEL